西環水街又爆鹹水管，雖然今次係畀渠務署工程掘爆，但係水管老化已經係老掉牙嘅問題，李衞眼見港人水劫纏身，即刻揪咗水務署長出嚟審……
李衞：全港水管老化，食水喉又爆，鹹水管又爆，你幾時先肯換晒佢？
水務署長：非不能也，實不為也！
李 衞：港人深陷水劫，你仲咁招積？打！
水務署長：且慢！你聽我講埋先！水街爆水管，射到八樓咁高，未到年廿八，成幢樓就可以沖涼洗邋遢，都算係德政吖！
李衞：沖鹹水涼都話德政？你呢啲膠官，真係死剩把口！
水務署長：點止呀？我仲好有國際視野，知道香港旅遊吸引力下滑，所以喺十八區都設置咗噴泉，只要到時到候，有緣分嘅遊客就可以欣賞鬧市噴泉奇景，何其壯觀！
李衞：咁都噏得出，唔教訓吓你點得！人嚟，同我剝衫！
水務署長：嘩！你想點？
李衞：幫你沖番幾日鹹水涼，清醒吓先啦！
第一手消息請下載on.cc東網李衞
