城中鏡：卿姐做埋基本法大使
尋朝早喺金鐘一間酒店見到立法會議員劉慧卿食早餐，過咗無耐，又見到財經事務及庫務局前局長「肥亨」馬時亨現身，原來肥亨都係約咗朋友食早餐。卿姐即刻捉住肥亨雞啄唔斷，仲講到選特首問題。
劉慧卿（右）向馬時亨推介《基本法》手機應用程式。
卿姐問肥亨係咪真命天子？肥亨就斬釘截鐵話，自己講過無意圖及企圖參選特首，亦唔會參選，講過就算數，絕不反口。佢哋又講到近期嘅政改諮詢，肥亨就話自己退隱官場多年，好耐都冇睇法律喇，一般市民都唔多明白啲法律講啲乜。呢個時候卿姐化身《基本法》宣傳大使，突然展示手機入面嘅《基本法》應用程式，仲叫肥亨快啲下載睇熟有關條文。
