城中鏡：樓神戴黑超 COOL魔上身
有「樓神」之稱嘅長實執行董事Justin趙國雄，每次出席長實嘅推廣活動時總會悉心打扮一番，次次出場都令人眼前一亮。尋日就收到佢嘅聖誕電郵賀卡，今次又有新驚喜，佢帶埋長實市場及銷售部門同事一齊變身為飛機師，配埋副太陽眼鏡，呢身裝扮真係入型入格！
呢張就係趙國雄同班同事飛機師LOOK嘅聖誕電郵賀卡。
Justin扮嘢出名早就響遍地產界，過去賣樓都曾經扮過大將軍、中東油王、醫生同楚留香等角色，每次都維肖維妙。今次變身飛機師，而背景就有長實總部長江中心，同埋集團出年頭炮、位於北角電氣道嘅新盤「DIVA」冠名嘅飛機。唔知佢今次扮飛機師，係咪寓意咗呢個新盤可以賣到一飛沖天，為二○一四年攞番個頭彩呢？
