城中鏡：女企業家真情Fun享
城中女強人組成嘅「金紫荊女企業家協會」日前舉行聖誕派對，一眾女企業家出席分享成功之道，協會仲請到特首CY梁振英太太梁唐青儀分享如何兼顧事業與家庭。梁太大爆當年為湊仔，甘願放棄律師工作，又話當年同CY嘅成績只係一般，但最終都各自成為專業人士，所以讀書成績唔代表一切。
梁唐青儀（右三）大談成功之道，協會副主席林淑怡（右一）、李凱琪（左一）、章曼琪（左二）、仁愛堂副主席羅台秦（右二）同台北經濟文化辦事處商務組副組長陳愛蘭（左三）都細心聆聽。
派對大玩帽飾，協會常務副主席丘璟珊（左）同鄭燕華（右）嘅禮帽搶晒鏡。
何綺蓮（右）聖誕節都忙公職，好在有醫生老公何銘泰（左）喺背後默默打氣。
梁太細訴進修艱辛
梁太話早喺大仔升小一後，有感湊仔要花好多耐性同心思，決定投身全職太太行列。不過，當大仔讀三年級時，佢不忘持續進修，得悉北京大學喺香港開辦首屆法學士課程，於是膽粗粗報名。
梁太笑言要「轉台」讀中文法律好吃力，加上每日湊完仔女返學，打理家頭細務再煮埋晚飯，往往忙到三更半夜先可以溫書。記得有次同家人旅行，CY揸車，梁太就話自己喺車內刨筆記，四年後終於攞到個學位。
鄭燕華：曾被上司輕視
協會副主席Winnie鄭燕華就話走女企業家呢條路困難重重，因為要同時兼顧多重身份，要平衡當中角色並不容易。Winnie透露，曾遇過重男輕女嘅外籍上司，輕視佢嘅工作能力，激起佢發奮交出漂亮成績，終獲上司認同。
講番女企業家協會，明年大計多多，創會主席何綺蓮話，台灣商機無限，不妨諗吓美容業同發展產品代理，稍後佢將帶隊到台灣考察，等班女企業家近距離睇真啲喎。
