設計圖片及對白
建制派議員葉國謙喺舊年底提出「剪布動議」，建議每名議員只能就每項立法會財務委員會議程提出一項毋須預告嘅動議，杜絕泛民議員以突然提出大量動議為由不斷「拉布」。泛民見勢色唔對，迅速提出一百九十萬九千二百八十三項修訂，秘書處經粗略估計後得出最少要用四百零八個工作月先可以睇完所有修訂文件，仲未計算討論同表決時間。
同屬建制派嘅「星爺」吳亮星喺當選財委會主席前不時批評泛民議員嘅「拉布」行為，搞到泛民擔心佢上場後會變得鐵腕管治。不過，近日星爺來個華麗轉身，覺得處理「剪布動議」費時失事，事關大家拗來拗去都係得個吉，加上真係搞得完都要三十年後，於是決定喺任期內唔會提出呢項動議。換句話說，如果動議人無異議，即係有關「剪布動議」會連同泛民嘅百幾萬項「拉布」修訂被「雪藏」，亦可以話星爺先剪咗自己友喇！
其實，過去議員開會遲到早退、唔專心開會、經常出出入入會議廳、提出其他議員問過嘅問題等情況亦好嚴重，嚴重拖長會議時間。不過，星爺就對呢班「問題學生」苦無良策，惟有喺議員提出同一條問題時溫馨提示兩句，或者叫議員唔好經常出出入入會議廳。
第一手消息請下載on.cc東網
