蔣麗芸（右）掃咗十部圖中嘅意大利粉製麵機。
多名建制派立法會議員尋日拉隊行工展會，當中收穫最豐富嘅非議員Ann蔣麗芸莫屬。皆因佢只係行咗一個多小時，就幫襯超過二萬元，買咗十部意大利粉製麵機、八部手提蒸氣熨斗同十幾個湯包，真係大出血。阿Ann買咁多同款物品，原來係諗住當聖誕禮物送畀親朋戚友，順便支持工展會同本地公司研發嘅新產品喎！
鍾樹根（右）尿酸過高，拮住件鮑魚有得睇冇得食。左為東區區議員周潔冰。
其他人又點呢？身高一米九二嘅漁農界「高佬賢」何俊賢尋日終於遇到勁敵，遇上被稱為廠商會高佬嘅會董陳家偉，唔知係咪大家咁高咁大，易啲溝通呢？期間陳家偉帶住高佬賢周圍參觀，有傾有講咁。不過，最陰功嗰個就係鍾樹根，因為喺大家試食鮑魚嘅時候，唯獨佢冇得食，佢話早前去咗做身體檢查，醫生話佢尿酸過高，所以依家要乖乖哋戒食海產喎！
第一手消息請下載on.cc東網
