政壇：梁智仁驅寒湯圓醒手足
呢幾日凍冰冰，醫院管理局新任主席梁智仁同行政總裁PY梁栢賢就趁尋日開大會前，專登搵人去九龍城買芝麻湯圓請大家食，可以暖吓身驅寒。梁智仁食得好滋味，大讚湯圓夠煙韌，仲向病咗幾日嘅「師弟」、食物及衞生局局長高永文發出溫馨提示︰「天氣凍好易病，薑汁煮湯圓可以驅寒，早知叫埋高永文嚟食湯圓。」可能主席有所不知，其實高永文呢啲叫「辛苦病」。
梁智仁（左）同梁栢賢（右）大讚芝麻湯圓夠煙韌。
梁智仁尋日首次以主席身份主持醫管局大會，見佢無怯場，講起公立醫院未來大計似模似樣，話加急症室收費既要考慮政府財政情況，又要顧及政治環境，依家都唔係適合時機提加費喎。佢仲話好支持政府推自願性醫療保險計劃，又有興趣研究下港人買醫保嘅情況。
不過，始終離開公營醫療體系一段時間，當講到公立醫院嘅服務時，佢話都係交番畀PY解釋好啲。
