政壇：郭偉強扮漁民露心迹
工聯會嘅立法會勞工界議員郭偉強尋日同傳媒午敍，講到香港應該點樣效法台灣等地發展旅遊業，就建議可考慮連貫香港仔啲景點，之後仲講到自己同漁民一家親咁，一直有傳話諗緊出選港島區直選嘅佢，莫非係有意參選漁農界？
設計圖片及對白
郭偉強話未來嘅工作目標，除繼續爭取標準工時、關注工人工資，以及環保同堆填區、焚化爐等議題，話可能會研究吓點樣發展香港嘅旅遊業，好似香港仔咁，其實到目前為止，呢度仲係香港其中一個漁獲最豐富嘅碼頭，附近嘅避風塘更有悠久嘅歷史，加上一啲造漁船嘅地方，相信呢啲景點，可連成一線，變為提供畀旅客遊覽香港仔一日嘅建議行程。
大講細個拜山經驗
提起香港仔，佢即時講到佢同呢撻地方嘅感情，話原來佢自小喺呢度長大，佢太爺嗰代同之前嘅祖先都一直住喺大澳，所以佢算係出身自半個漁民家庭o架。
郭偉強仲記得細個嘅時候，每逢清明等時節，要去拜祭祖先嘅話，就會同家人喺未天光搭車又搭船，上山又落山，用最少三、四小時去到大澳，一來一回就用足一整日。
曾經被阿媽掉落水
佢又話，雖然由佢爺爺嗰代開始已移居香港仔，但佢小時仲有唔少機會上漁船玩。
咁咪會好熟水性囉？咁又唔係喎，因為佢媽媽信奉傳統嗰一套，認為小朋友只要被掉落水，就會自然識點游，而佢就因為咁而險遇溺，自此就更加唔識游水，最多只可以喺水入面撐幾吓，吸兩啖氣，就會變潛艇，童年陰影喺成長後，就更難克服喇。
不過，郭偉強強調只要攬住件救生衣，仍然夠膽去玩水上活動喎！唔知佢日後真係參選港島區直選嘅時候，戰況咁風高浪急，佢使唔使用救生圈呢？
