一疫未平，一疫又起。內地H7N9禽流感疫潮未退，新禽流感H10N8又爆發，一名江西老婦不幸中招，短短幾日就病逝，成為全球首宗感染及死亡個案。禽流感病毒不斷變種，鑊鑊新鮮鑊鑊甘，你都咪話唔得人驚！

內地禽流感肆虐，香港自然雞犬不寧。食衞局局長高永文話喎，死者曾經去過街市接觸活家禽，顯示無論邊一類型嘅禽流感病毒，最高風險始終係近身接觸，提醒市民若然返到內地，千祈唔好觸摸活家禽咁話。嗱，高永文嘅官腔唔係唔啱，不過只係啱咗一半，佢應該提醒埋市民，就算冇返內地，都要小心嗰啲被人非法運入境嘅舂瘟雞吖。

係咁嘅，聖誕節將臨，又係火雞熱賣季節，網上近日出現大量兜售貼子，以價廉物美做招徠，點知有光顧過嘅市民投訴，所謂嘅速遞火雞原來只係用個真空袋包住，完全未經冰鮮處理，唔只血淋淋，而且有異味，成隻發霉火雞一樣，睇見都唔敢食。咁搞法，容乜易畀禽流感病毒乘虛而入殺入香港o架？

港產官僚後知後覺，旨意佢哋把關，蚊都瞓蛇都死喇。等太一叮提醒大家，禽流感防不勝防，舂瘟雞可免則免，絕對唔值得搵自己健康甚至條命較飛o架。雖然話H10N8個案暫時只得一宗，但經驗告訴大家，瘟疫好似貪腐一樣，有一必有二，有二必有三，想㩒都㩒唔住。H7N9就係典型例子，最初同樣係個別人感染，依家已經攻陷全國，連香港都中招。呢，尋日廣東又增加一宗確診個案，令全國感染病例增至一百四十幾人，廣東短短時間內就有五宗。仲有吖，肆虐中東嘅新沙士更加可怕，沙特又新增兩宗個案嘞，問你怕未。

太一叮第二個要提醒嘅就係港產官僚。防疫宜緊不宜鬆，家陣咁大個防疫漏洞擺喺眼前，仲唔快啲補鑊？病毒無疆界，市民就算冇北上接觸活家禽，禽流感病毒一樣有機會隨走私火雞等家禽南下，萬一香港再次淪為疫埠，你哋集體返歸吔舂瘟雞都得嘞！

一句講晒，防疫有備無患，執法切勿偷懶。禽流感來勢洶洶，新沙士揮之不去，疫魔雙重夾擊，唔係講玩，港產官僚記住打醒精神，千祈唔好又害到市民雞毛鴨血吖，叮！

第一手消息請下載on.cc東網iPhone/iPad/Android/Windows Phone Apps