城中鏡：張建宗座駕硬Cut雙白線
局長出巡勇闖雙白線？一般俗稱「AM車」嘅政府座駕，由於平日載住唔少高官出入，大部分司機開工時都好守規矩，但記者前晚揸車行經佐敦時，就驚見負責接載勞工及福利局局長張建宗嘅專用座駕，喺天雨路滑、路面擠塞情況下公然由右至左咁Cut雙白線，整個Cut線過程接近十秒，舉動更令隨後嘅多輛汽車響號抗議。
「AM38」冒險Cut雙白線，原來司機係護送張建宗（圖）出席政黨黨慶。
載住張建宗嘅專用局長座駕「AM38」（箭嘴示），喺濕滑路面罔顧安全轉左猛Cut雙白線。
「AM38」Cut雙白線期間，隨後嘅車輛響號抗議。
前晚約七點鐘，天寒地凍加上落住微微細雨，放工一族都歸家似箭。記者喺佐敦揸車往尖沙咀方向，途經近柯士甸港鐵站、廣深港高鐵西九龍總站地盤對開時，因為塞車而要龜速行駛。忽然間，一架車牌號碼「AM38」嘅政府座駕有所動作，原來座駕想喺已經逼到沙甸魚咁嘅車龍大軍中，搵位由右線Cut入左線。
隨行人員辯稱唔覺意
不過，條路除咗塞車兼濕漉漉，地下條雙白線仲相當顯眼，呢位「AM38」司機喺多架車齊聲響號抗議下，仍懶理「民意」兼罔顧自己揸緊AM車嘅敏感身份，決定勇闖雙白線。成個潛越雙白線過程險象環生，簡直離譜，究竟司機有乜嘢咁趕時間呢？
經記者抽絲剝繭查探後，原來張建宗當晚聯同多個司局長拉大隊出席政黨位於尖沙咀嘅黨慶活動，隨行人員事後堅稱對司機Cut雙白線唔知情，歸咎當時路面塞車，唔少車都左穿右插，相信司機Cut雙白線都係「唔覺意啫！」又急忙護主話張建宗一向要求司機小心駕駛，唔好揸咁快。唔覺意？豈不是博大霧Cut雙白線？
根據香港法例374G章《道路交通（交通管制）規例》第11條，違反雙白線道路標記規定，可被扣減三分及罰款四百五十元，奉勸司機大佬小心駕駛，安全事大呀！
