SUN搞作：打橫嚟講︰香港亂象下有乜好撈？

嗰頭一籃子因素，呢頭就路姆西橫飛，話口未完，又嚟一劑「新移民居港一年攞綜援」的「特大慘案」（對本地交稅的香港人而言）。

據報，當終審法院頒布判決時，嚇得香港廢柴政府有關官員屎淋尿瀨，目瞪口呆，慌亂失措，皆因佢哋無預計有此結果！又一鑊！

呢劑被本土港人視為「特大慘案」的悲劇，只係個開端，而非結局，因跟住的手尾，確實長過水蛇春，其影響（應是禍害）之大，已非人類、尤其係香港那群「低B界」能想像到的！

普通香港正常人可預見的「公屋申請」、「傷殘津貼」、「生果金」、「長者生活津貼」及「醫療」等福利拗撬外，甚至「法定選舉」或「公民投票」都成一籃子問題，而且，分分鐘會喺法庭相見的兵戎械鬥，怎不叫人憂慮！

當全城烏雲密布，風雨欲來之際，有件港大法律系講師張達明認為今次裁決只影響綜援制度，不會引伸至其他公共服務或經濟政策受挑戰喎！佢個腦生喺邊o架呢？乜構造的？

勿說福利政策和開支，會引發香港轟天嘈吵，淨係呢個「居港一年」的福利缺口崩毀，隨即而來的，不只大陸人蜂擁擠來搶食，就是香港政壇亦即時分裂再分裂，不只得泛民失守，就是建制派也各懷鬼胎，互插上位，這長期不穩妥的非和諧環境，香港點會好？

在零管治能力下，香港仲要讓一棚廢柴高官把持亂舞，只得一個行業有得發展，就係移民公司！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府