SUN搞作：少膽虫手記︰等班同事開心吓
聖誕臨近，《爛果》好多同事都希望公司搞吓抽獎活動，一方面可以偷懶，另一方面又可以攞着數，所以我都好贊成，於是就去徵求淫賤黎同意。「好！阿虫，一定要搞得好好睇睇，等班同事開心吓！」淫賤黎平日孤孤寒寒，勢估唔到竟然舉腳贊成，咁難得佢忽上腦，本虫即刻食住上：「腦細，準備乜嘢禮物好呀？」「五部土豪金唉瘋！你快啲發通告畀班細嘅，振奮吓士氣！」
抽獎消息頃刻傳遍公司，個個開心到震，肥豪同膠蘇仲即刻大跳開心舞，表達開心之情。「腦細，我哋幾時進行抽獎儀式？」少膽虫我出名蠱惑，梗係諗住出術攞獎，點知淫賤黎就話：「抽咗啦，畀我中晒！」吓？！「腦細，你又話等班同事開心吓嘅？依家你獨吞啲獎……」淫賤黎奸笑一聲，輕搭少膽虫膊頭：「你睇吓，畀個發夢機會佢哋，班同事依家咪幾開心囉。」少膽虫正苦惱點同班細交代，淫賤黎再畀個晴天霹靂我：「阿虫，嗰五部唉瘋機錢，我會喺你份糧度扣數！放心，我一定同班細嘅講，禮物係你贊助嘅！呵呵！」
