政壇：搞搞政：中大醫學院是非多 陳家亮要打小人

陳家亮仲自嘲話今年是非多，「上任院長霍泰輝教授話呢個位只係同人食吓飯，剪吓綵，冇乜嘢做，原來都唔係。」數到最令佢覺得難搞嘅，就要數余卓文嘅「心臟事件」莫屬，件事令佢又頭痛又心痛。

年初爆出余卓文封刀事件，陳家亮嗰陣先上任幾日，好多人牽涉其中，要諗辦法平息風波。作為余嘅上司，佢只話件事仲查緊，依家兩人日日喺辦公室撞口撞面，外界都估佢哋會面左左。佢話見到會打聲招呼，而且院長道門一直打開，余教授有乜嘢都可以隨時搵佢咁話。

講番新年新大計，佢派卡片時就落力硬銷學院出咗新標誌，話係兩塊杏葉組成，象徵為杏林界注入生命力，未來一年最想推動大腸癌篩查計劃。唔講唔知，作為腸胃科專家嘅佢都有腸胃敵人，佢自爆話唔受得奶類，一飲就屙，所以飲咖啡都要走奶，或者咁樣仲飲真啲咖啡嘅味道。