政壇：葉劉拉攏獨立議員傾政改
行政會議成員兼新民黨立法會議員葉劉淑儀，尋日宣布成立「政制發展研究小組」，就二○一七年特首普選諮詢各界意見，明年諮詢期完結前會向政府提交具體政改方案建議。以該黨名義成立嘅研究小組包括幾位建制派獨立議員，包括商界廖長江、保險界陳健波，仲有建築、測量及都市規劃界議員謝偉銓。葉劉喺過去一年三顧草廬邀請陳健波同謝偉銓入黨，雖然佢哋不斷請葉劉食檸檬，但反而肯以個人名義加入小組傾政改。
葉劉淑儀（中）宣布成立政制研究小組，但否認為參選下屆特首鋪路。
該黨副主席田北辰話，研究小組暫時未有既定立場亦未必會綑綁投票，一切要睇最終政府拋出嘅方案後再決定點投票。被問到成立研究小組係咪為參選下屆特首鋪路，葉劉話依家首要工作係要協助社會凝聚共識，現階段並無任何打算。葉劉講到呢度，黨中委譚榮邦即時搶咪話，如果葉劉成立小組係因為想佢哋幫手造勢選特首，佢會即刻退出喎！
