早前都同大家講過，食物及衞生局局長高永文今個月初喺立法會開會時已開始猛流鼻水，連議員蔣麗芸都叫佢不如去打疫苗。點知事隔兩星期，佢嘅病情未有好轉，尋日喺立會回答質詢時把聲都沙晒，就算係咁飲水都唔掂。唔知係咪受藥物影響，佢一度連議員問乜都唔記得，仲搞到被寸嘴嘅議員鍾樹根叫佢去睇急症。高永文病到咁都仲死頂返工，唔通佢唔放心畀副局長陳肇始代勞上陣？

高永文病到聲沙沙，又起痰又咳，回答議員質詢時不停飲水。

高永文尋日喺立會要連續回答兩條質詢，聽見佢把聲沙晒，講嘢時又起痰又咳，差唔多每講兩句就要飲水，連向佢提問嘅議員都戥佢辛苦，個個都叫佢唔好咁勞碌，事關近日爆發多宗禽流感事件，要好好保重身體打仗。雖然佢帶病回答質詢，但樹根都冇畀面，仲話依家去公立醫院急症室睇病成日要輪候八至十個鐘，話高永文咁嘅狀況可以去睇急症，除低眼鏡等人認唔到佢，就可以順便親身試一試輪候時間有幾耐嘞！

第一手消息請下載on.cc東網iPhone/iPad/Android/Windows Phone Apps