政壇：吳伯雄長子力銷航空城
台灣桃園縣縣長吳志揚尋日率領一班官員來港，為台灣歷來最大投資規模嘅桃園航空城招商推介。吳志揚來頭唔細，係國民黨榮譽主席吳伯雄長子，由佢阿爺吳鴻麟開始，三爺孫都做過桃園縣縣長，所以佢任內瞓身搞好航空城，可以話係家族嘅歷史重任。
吳志揚（中）首次官式訪港，嚴重光（右）同孫至誠（左）協助推介航空城。
吳志揚話今次係佢睽違二十年後再次踏足香港，難得嚟到，好多城中名人都去捧場，包括台北經濟文化辦事處嚴重光、台北貿易中心主任孫至誠同旅港台灣工商界人士。
航空城佔地六千八百幾公頃，係以桃園國際機場及機場捷運線各車站為核心，規劃區域包括物流、金融、住宅及文創科研等。吳志揚又透露，尋日會前曾同機場管理局行政總裁許漢忠會面取經，雖然香港正擴建第三條跑道，而上海就試行自由貿易區，但佢相信三者之間可以產生互補作用。
