政壇：袁國強做黑夜煙民

政改專責三人小組之一嘅律政司司長袁國強尋日同班學生真情對話，當有學生問佢點睇「佔領中環」時，佢即刻苦口婆心叫學生唔好做違背法律嘅事，又話表達意見有好多種渠道，唔一定要犯法。最後佢仲推介睇一本英國法官撰寫嘅名著《The Rule of Law》，希望學生分析時事要有國際視野。

袁國強被問到「佔領中環」嘅問題時，佢叫學生唔好做違背法律嘅事。

袁國強叫學生遵守法律，值得一讚，但近年青少年吸煙問題愈來愈嚴重，作為煙民嘅佢就冇叫學生切勿吸煙。話說佢被譽為最後一位「司局長級煙民」，但佢加入政府一年多後，從未有人見過佢喺政府總部外吸煙，接觸過佢嘅政界人士都話聞唔出佢身上有任何煙味，莫非佢戒咗煙？

佢前晚出席一個活動時就解釋呢個傳聞，原來佢屬於「黑夜煙民」，每日都係返到屋企，夜闌人靜時先獨自「呼吸」。佢仲話入政府之後已好少吸煙，一星期最多一包煙（即二十支）。食煙始終危害健康，佢食少支始終好啲。