大米含鎘周街賣 食安官僚一舊飯

消委會測試市面四十四款白米及糙米，揭發三款產自內地嘅大米樣本重金屬鎘含量超標，其中一款鎘含量最高，每公斤含0.223毫克，比每公斤0.1毫克法定上限高出一倍有多；其餘兩款亦被驗出鎘超標約五成。消委會警告，長期進食鎘含量高嘅食物，可能損害腎臟，而食安中心就話，市民每日進食重金屬超標嘅白飯超過三碗，即可能影響健康。

知就好喇！明知含鎘大米咁毒，點解食安中心仲要掉以輕心呢？白飯係市民嘅主糧，若然連大米都失守，仲有乜嘢可以食得安心呢？嗱，呢個「食不安全中心」急急補鑊，巡查後發現至少一款含鎘大米喺市面仍然有售，咁即係話，如果唔係消委會踢爆，市民可能仲要日日「吸毒」。大家話喇，食物安全靠港產官僚把關，係咪民以食為憂吖？

其實，內地鎘米氾濫成災，早就唔係新聞咯。幾個月前，廣州揭露市面近五成大米及米製品樣本鎘含量超標，其中大部分來自湖南，事件喺內地鬧得沸沸揚揚，反而港府成舊飯咁毫無反應。港產官僚對食物安全問題漫不經心，等如搵市民健康博一鋪，簡直豈有此理。喂，以前周一嶽年代都衰夠喇，三聚氰胺毒奶粉、孔雀石綠魚、重金屬蔬菜、蘇丹紅禽蛋，次次後知後覺，餐餐如夢初醒，鑊鑊新鮮鑊鑊甘，點知周一鑊滾蛋之後，當局依舊渾渾噩噩，懶懶散散，想唔自取其辱至奇。

事實證明，當局不思進取，對食安問題嘅思維仍然停留喺幾十年前。以前神州大地山明水秀，土產就話魚鮮米甜啫，但係近呢幾十年，內地污染嚴重，生態蒙難，化工廠排污水落河，有毒河水又扚番上嚟種田灌溉，種出嚟嘅農作物殺番人類，整個中國就喺呢個互相殘殺嘅畸形生態圈中循環，話中華民族遲早亡國滅種，並非危言聳聽。喺咁嘅情況下，港產官僚居然不設防，任由問題食品長驅直入，唔係靠害又係乜！

講到尾，都係中國人嘅不幸。神舟升空嫦娥奔月又有乜用啫？中華民族集體慢性自殺，遲早都斷種滅族㗎喇。有能力登陸月球，居然無能力搞好桌前碗飯，老百姓連食餐安樂茶飯，飲啖乾淨食水，吸口新鮮空氣都變成奢望，咁嘅政府點可以稱得上為人民服務吖。好衰唔衰，如今港產官僚被內地同化，一樣草菅人命，叮！