香港的法治問題，從人多擠迫的街道兩旁非法佔用公共空間的易拉架，可見一斑！

那已去到無王管、無法無天境況的易拉架，位置愈擺愈出，塞住行人道，而架起建構的面積，更愈撐愈大，好比一間小舖位，咁都未算PK，呢啲易拉架最愛一扇形平排，成幅牆咁遮蓋人家一百幾十萬月租嘅舖頭，除不公義不合法地搶奪人家應得權益外，更是阻礙途人出入之方便和安全。

可惜，香港廢柴政府往往不是束手無策，任由易拉架的主子財團橫行霸道，就是庸廢地當睇唔到。

西洋菜街是易拉架亂象的重災區，一直為該區「黑勢力人士」灌注收入得益，助長勢力擴張，連報章也報道過那處擺放易拉架須得付「服務費」給「一條龍」公司「管理」，這些普通平民百姓也得悉的行規潛規則，唔知點解，香港警方卻無人執法？

哦！原來，香港警方直至今年六、七月派員放蛇，自擺易拉架，即時遭人毀壞，就相信果然係「堅」嘅！遂部署拉人。

早前，因西洋菜街過分喧嘩雜亂而縮減開放時間，在此開攤搵食爆歌的賣藝人接受傳媒訪問時，誓神劈願話無「陀地」滋擾，咁唔知佢好彩，定係啲陀地賺夠，咁大舊肥豬肉，又怎會唔放入口呀？講大話說謊言自保，成為香港特區內的常態，亦等於縱容惡行的橫蠻，呢度仲點會有好日子過吖！

今劑要多謝和呼籲香港警方，除拘捕易拉架的陀地外，更應控告易拉架的主子，咁先可徹底解決問題。之後，還須緝拿收陀地（和畀陀地費）的歹徒，幫香港法治立威！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps