SUN搞作：少膽虫手記：假髮與假「鮑」
公輾會又開鑼，知道有免費嘢派，貪威識食嘅少膽虫，梗係唔會放過呢個好機會。正所謂一箭雙鵰，一於順便約埋淫賤黎行街，聯絡吓感情。
等淫賤黎拮完舌針，喺富豪飯堂扮上等人歎完茶，少膽虫就恭恭敬敬，接埋淫賤黎行過去會場喇。「虫！今日搵我嚟得呢度，有咩着數先？」淫賤黎今日心情大靚，講句嘢把聲都零舍響亮，「腦細，我收到風，呢度有免費芳鮑試食呀！」一聽到免費兩隻字，淫賤黎即刻雙眼發光。
去到攤位，成棚阿公阿伯湧晒過去，個個舉高晒雙手，見此奇景，深明「餓狗搶屎」道理嘅淫賤黎高聲一叱──「等埋！」就即刻狗衝埋去，少膽虫喺旁邊，出盡奶力幫淫賤黎打氣，混亂之間，有人大力一扯，淫賤黎嘅頭髮瞬間滑落──原來係假髮嚟！
少膽虫看得傻了眼，只見淫賤黎拎住一盒免費鮑，「腦細，乜你啲頭髮原來已經……」淫賤黎望住個紙盒，流晒口水咁答：「《爛果》嘅準確度，同我啲頭髮一脈相承嘛！」語畢，淫賤黎揭開個盒，赫然發現入面只有一片「方包」……佢即刻惱羞成怒，少膽虫惟有兜番：「腦細，其實個道理同你把頭髮一樣啫……」
