城中鏡：永隆換制服預埋茶水阿姐

永隆制服一向以黑色為主，今次新設計加入紅色點綴，女裝仲要係連身小圓裙，又young又sweet，而私人財富管理大使嘅新制服則紅黑撞色，加埋紅色西裝長外套有少少貴婦feel，感覺同啲大客應該比較易傾得埋。據講永隆今次新制服由設計學院學生設計，咁做一方面畀啲機會年輕人，同時啲作品又有活力，配合永隆創新形象。

要欣賞佢哋嘅新制服仲要再等多排，但唔使失望，如果去開中環或者旺角，不妨入去永隆銀行走一趟，包你有驚喜。首先大門口嘅自動玻璃門貼滿旋轉木馬，客人出入幾層玻璃門睇落好似一個開動中嘅旋轉木馬，又唔使用額外電源，夠晒環保。