城中鏡：94歲王霖爺爺帶學生遊立會
立法會尋日舉行議員同前議員午宴，邀請咗二十幾名前議員參加，立法局年代嘅議員王霖亦有出席，仲幫手帶小學生參觀立會新大樓添。雖然王霖已經九十四歲，但佢又學電腦又學攝影，仲成日去長者中心分享，唔怪得啲現任議員都話佢好精靈啦！
王霖（前排右四）同前議員蔡素玉（前排右五）齊齊帶小學生參觀立會。
唐英年（左二）遇上前議員曾健成（左三）、霍震霆（左四）。
前議員方黃吉雯（左二）同現任議員單仲偕（左一），兩人唔同期。
王霖當年張議員委任證已成為立法會嘅展覽品。
王霖之前已去過立會新大樓，但帶導賞團就係第一次。佢同班小學生去完大堂影相，又去圖書館參觀，見到立法局時代嘅主席椅時仲忍唔住摸吓，又同張櫈影相。佢話自己做過三屆議員都冇試過同張櫈咁近距離喎！而立會就陳列咗佢當年張議員委任證。
養生秘訣：開心
問起有乜養生之道？王霖話最緊要保持開心，佢依家都仲好留意時事同議會，又成日識新朋友，有人邀請佢參加活動都會盡量出席，話同朋友多啲分享，自然就開心啲喎。佢又話以前立法局有規有矩，依家就成日掟嘢，立會會議又可以喺電視睇到，所以會對香港造成負面形象，仲搞到啲後生仔平時喺政府地區諮詢會都有樣學樣，真係教壞下一代咁話。曾任議員嘅前政務司司長唐唐都有出席午宴。議員范國威就借咗隻最近大熱嘅狼公仔路福西（原名路姆西），諗住帶埋佢同唐唐合照，但唐唐就一句「唔好玩我啦」婉拒咗。
最近有傳前財政司司長「阿松」梁錦松參選特首，唐唐話阿松冇向佢透露，但佢就話阿松好能幹同熱心服務社會，如果參選佢一定會鼓勵。至於阿松曾涉偷步買車，唐唐就話社會上每個人都有犯錯嘅時候，佢自己都曾僭建，相信社會會原諒知錯能改嘅人喎！
