政壇：搞搞政：討論纏擾法議員亂咁噏
應否就纏擾立法呢個議題，政府研究咗十三年，但至今仍然未能令新聞界相信法例唔會對採訪自由造成任何影響。立法會政制事務委員會尋日再次討論有關問題，有個別議員對乜嘢算係纏擾行動「是但噏」，好似「單雞」單仲偕咁，佢就質疑資訊科技界議員莫乃光成日寄電郵畀選民係纏擾行為，體文界馬逢國更投訴自己近日不斷畀人纏擾，希望法例除咗可以保障演藝界免受纏擾外，仲可以順便保護埋自己。
設計圖片
不滿遭跟蹤
馬逢國尋日突然自爆，話自從佢就係咪引用特權法徹查免費電視發牌一事投棄權票後，佢每次出入立法會，都受到素未謀面嘅市民等候、跟蹤同纏擾。當佢一踏出大樓，該兩名市民就會大聲對住佢講啲不禮貌同侵犯性嘅說話，仲要跟佢足足行夠一百米先離去。
政制及內地事務局副局長劉江華就話，纏擾法唔單止保障公眾人士私隱，連普通市民都會保護。馬逢國再問有乜嘢措施可以保障當事人免受纏擾，劉江華就妙答話要訂立法例，主席譚耀宗再加把口話現時法例幫唔到馬逢國，叫佢諗過其他辦法。
