政壇：愛港之聲搞網台爛尾
早喺年初，「愛港之聲」就公告天下話有意成立同名網上電台，向年輕人宣揚愛港理念，同近年百花齊放嘅泛民反政府網台搶客抗衡，但至今只聞樓梯響，拖到依家都未正式開咪。愛港之聲召集人高達斌強調，佢哋搞網台要人有人、要錢有錢，唯獨係欠缺相關廣播技術，所以早前就委託咗一位有搞網台經驗嘅「同路人」仗義幫手，可惜高達斌所託非人，呢位同路人搞搞吓突然停晒手腳，令網台「爛尾」，搞到佢哋遲遲未能透過互聯網發出「愛的呼喚」。
高達斌指愛港之聲搞網台唔缺人亦唔缺錢。（資料圖片）
高達斌透露，佢哋搞網台早有一位愛國富二代認頭做幕後金主，錢從來唔係問題，但點知最後畀呢位同路人蹺起，遲遲交唔到貨。佢哋最近決定直接搵呢位幕後金主提供埋技術支援，有望喺明年一月試咪，希望盡快正式啟播。
除咗搞網台，愛港之聲近日亦忙於籌備元旦日下午舉行嘅撐政府嘉年華。高達斌好風騷咁話，建制派過往只敢都匿喺七一或者元旦日嘅朝早搞撐政府集會，係愛港之聲先夠膽同三點鐘開始嘅民陣遊行分庭抗禮，預計起碼過千人出席喎！
