政壇：首間氣候博物館落戶中大
氣候變化同我哋嘅生活息息相關，全港首間以氣候變化為主題嘅博物館「賽馬會氣候變化博物館」，尋日喺中文大學校園開幕，賽馬會行政總裁應家柏、環境局副局長陸恭蕙、中大校長沈祖堯同香港女探險家李樂詩應邀主持開幕儀式。李樂詩出征南北極就當「家常便飯」啫，唔知其餘三人又有冇感受過極地嘅天氣？
應家柏、陸恭蕙、沈祖堯同李樂詩齊齊愛斯基摩人上身拍照留念，夠晒趣怪。
要感受極地氣氛唔一定要親歷其境，佢哋四個尋日就走到博物館內特設嘅互動投影器，喺雪狼、北極熊同破冰船嘅極地背景下，齊齊愛斯基摩人上身拍照留念，相當盞鬼。
其實博物館之所以能夠落戶中大，緣於李樂詩同沈祖堯一次碰頭促成。話說李樂詩喺二十六年前已有意設立極地博物館，但四圍向工廈、丁屋及學校「叩門」覓地都慘食檸檬，好彩李樂詩幾年前喺中大一個講座首次同沈祖堯碰頭，膽粗粗向對方表達建館意願，對方即刻拍心口應承，博物館先至有今日，而展館部分珍貴極地相片、標本，更加係李樂詩嘅私人珍藏添！
