霧霾南侵鎖香江 治污無策灰到爆

受到內陸東北季候風影響，本港近日變咗「特霧霾城」。就講前日吖，環保署轄下十四個一般及路邊監測站均錄得「偏高」空氣污染水平，污染源主要來自可吸入懸浮粒子；其中元朗一般監測站更一度「破百」，東涌及塔門亦錄得逾八十水平，罕有高過路邊監測站數據。值得留意嘅係，以上數據只係當局嘅寬鬆標準咋，如果以世衞最新標準量度，更加發現所有監測站嘅可吸入懸浮粒子及微細懸浮粒子均超標一倍以上，其中元朗嘅濃度仲超標兩倍添，問你怕未。

點解突然十面霾伏呢？環保組織係咁講嘅，華中地區近日出現高壓脊，加上本地冬季受內地季候風影響，推測灰蒙天氣同內地霧霾有關。唉，咁就大鑊啦，內地污染嚴重，煙雲蔽日，莫講人呼吸困難，連寵物狗都不能幸免患上咳嗽，若然霧霾持續南侵，港人容乜易變晒人肉吸塵機o架？

一早話過啦，一榮俱榮，一污俱污。內地霧霾密布，半個中國淪陷，香港點可能完全獨善其身吖，加上港產官僚渾渾噩噩，既對危機闊佬懶理，又對治污束手無策，雙重夾擊之下，東方之珠唔淪為「霧都」至奇。係人都知，懸浮粒子可引致呼吸系統疾病，令患肺癌風險激增，甚至影響生育能力，市民本已飽受空氣污染困擾，家陣再多一層毒霧危機，雪上加霜，你話香港點可能成為宜居之城吖！

唔講猶自可，一講把幾火。大家應該仲記得，前特首曾蔭權爵士曾經信誓旦旦，要將藍天白雲還番畀香港人，結果佢做唔成青天大老爺，反而做咗「氣候逃犯」，搞到家陣藍天白雲就冇嘞，霧霾毒氣就大把，你話佢唔係人民公敵都唔得啦。當然，貪曾嘅遺禍唔止令到空氣污染愈演愈烈，更加令官場烏煙瘴氣，對廉政造成嘅禍害一樣咁大。

咁講啦，現時籠罩市民心頭嘅嗰一片灰色，唔止霧霾，仲有對當局推動環保嘅信心。太一叮鄭重提醒港產官僚，如果你哋再施政博大霧，對解決空氣污染問題唔嗲唔吊，坐視市民健康受損，就算未至於係「千古逆賊」咁嚴重，「香港罪人」嘅惡名亦一定走唔甩o架，叮！