城中鏡：好友齊捧鄭承隆愛駒
賽馬日撞正天氣轉冷兼落雨，入場嘅馬迷本應好掃興，但本身係馬主嘅Edwin鄭承隆就好高興，皆因尋日愛駒首次出賽，各路好友都紛紛入場支持，好似立會議員林大輝、懲教署署長單日堅夫婦都埋嚟打氣。
鄭承隆（左一）愛駒出賽，林大輝（左四）同單日堅（左五）都捧場。
單日堅睇落同Edwin大纜都扯唔埋喎！Edwin透露，年初因為睇咗本報有關運輸署拍賣「CSD HK」嘅車牌，非常近似懲教署英文縮寫而引起該署伙記不滿，佢於是慷慨仗義、低調出手以五千元投得車牌，以免落入其他人手中。單日堅作為懲教署阿頭，對Edwin貼錢投牌平息風波相當欣賞，知道佢愛駒首次出賽，梗係拉埋太太捧場啦。
至於大輝又同Edwin有乜淵源？原來佢哋都係同為監警會成員，由於開會經常碰頭所以都好老友，大輝尋日就趁去完工展會撐場，順道去馬場支持Edwin。
