城中鏡：孖女百日宴 呂鈞堯喜成雙
保良局前主席Quincy呂鈞堯月前添咗一對孖女，尋日中午喺酒店舉行百日宴，新舊保良人都大包細包到賀。Quincy揀奶粉首選韓國貨，事關佢太太Miyoung係韓國人，外父加埋親戚好友，幾乎每周飛韓國一次，講笑話靠佢哋「接濟」，香港奶粉荒都冇有怕。
呂鈞堯（右）與韓籍太太Miyoung（左）搵專人空運韓國奶粉到港，保證一對孖女有優質奶粉食。
廣東社團總會主席王國強都排隊整番兩個氣球公仔，拎返屋企氹孫兒一笑。
保良局前總理黃英鵬高歌一曲《每一個明天》，甚有唱家班水準。
韓籍太太泡菜饗親友
小孖女Katie呂知恩同Grace呂知映尋日穿上可愛公主裙亮相，任憑場內閃光燈閃不停，孖女依然大覺瞓，乖巧到極。Quincy已有囝囝兩歲幾大，今次再為人父，心情雙倍興奮，佢笑言呢日何止百日宴，直頭係二百日宴，因為孖女帶畀佢雙重喜悅。咁高興，好少開金口嘅佢上台高歌多首中英名「飲歌」，多位前總理同好友都輪流上台唱不停。
Quincy又捉埋太太真情剖白，坦言「養兒方知父母恩」，唔做過爸爸，都唔知湊大仔女原來咁辛苦，以後會加倍疼錫父母。喜宴上有唔少韓籍親友，呂太Miyoung悉心安排一味韓式泡菜，等親友食得更滋味。佢哋又為囡囡改名花盡心思，事關有啲中文字，韓文係無嘅。左度右度，終於諗到「知恩」同「知映」兩個名。一對孖女稍後會跟媽咪返韓國擺百日宴，感受韓國情懷。
籲賀禮捐保良局行善
雙喜臨門，唔少好友爭住請教生孖胎秘笈，Quincy話阿爺嘅兄弟有生孖胎基因，可能佢遺傳咗優良傳統，所以今次「打孖上」，純粹好運，無秘方。呂爸爸同呂媽媽都好開心，為孫女送上金器，期望孫兒快高長大，健康活潑。
Quincy就呼籲好友將賀禮捐畀保良局慈善基金，認真愛心爆棚。
