政壇：搞搞政：曾鈺成同建仔漸行漸遠
建仔日前舉行周年黨員大會，黨主席「阿譚」譚耀宗話好多朋友鼓勵佢哋派人參選來屆特首選舉，仲話喺芸芸政黨中，佢哋最有條件成為執政黨嘅，所以無理由唔派人出戰。佢又話相信黨員都好認同呢番說話，所以希望班手足繼續努力，將建仔朝住執政黨目標進發。
設計圖片
點知隔咗唔夠一日，創黨主席、現任立法會主席曾鈺成即刻出嚟「倒米」，用一大盆冷水兜頭淋，真係置主席顏面於不顧。尋日有傳媒問及建仔做執政黨一事，曾鈺成即刻爽快咁話，建仔能否做執政黨，除咗睇建仔本身實力，仲要視乎本港政治制度，唔係話做就做。佢後來索性畫公仔畫出腸，好老實話，如果建仔現時要成為執政黨，睇怕係脫離現實。
其實，兩個大佬「步伐」不一，都唔係第一次，幾個月之前曾鈺成曾發表「心魔」論，一度遭傳統左派圍攻口誅筆伐，當時捱批嘅曾鈺成大吐苦水，話點解做建制派就唔可以講民主呢？仲自爆有建仔內部兄弟話佢變咗民主派。但阿譚喺另一場合答記者時，就斬釘截鐵話未聽過呢啲講法，暗示話曾鈺成變咗民主派嘅唔係自己。
一個係黨主席，處處要顧住個黨；一個係有意為立會主席賦予「言論自由」，對問題勇於表達鮮明立場，而唔再好似以往嘅立會主席一樣，對所有問題唔表態。可能就係因為現實，令建仔兩個大佬，漸行漸遠。
