政壇：波波唔驚掟蛋驚記者
仲記得財爺鬍鬚曾月初跟隨特首梁振英落區，「誤中副車」慘遭掟蛋，連累坐隔籬嘅發展局局長「波波」陳茂波被蛋汁濺中，係佢繼去年出席新界東北發展論壇險被掟中水樽後，第二次「受襲」。咁啱佢尋日再次落區出席活動，見四周都唔覺有警方護身，睇嚟佢心口掛個勇字就「真空」上陣。
陳茂波（中）無懼雞蛋、水樽，仲罕有大開金口唱歌。
波波尋日應兒童發展配對基金邀請擔任活動主禮嘉賓，見佢入場後神態自若，零保安貼身照顧下依然同周圍嘅嘉賓有講有笑，似乎已擺脫過去兩次飛來橫禍嘅陰影。佢更罕有開金口，帶領學生唱聖誕歌「Joy to the World」晒歌喉添！
雖則話波波唔怕被掟嘢，但佢離場時選行另一條路避開記者訪問，轉個頭又見佢上載網誌，呼籲市民參與啟德發展區規劃，情願做番「鍵盤戰士」都怕咗迎戰記者。
