政壇：田二少蛋撻頭chok到飛起

新民黨上星期喺中華出入口商會會所搞咗個蛇宴聯歡會畀黨友敍舊，該黨主席葉劉淑儀、前副主席史泰祖等黨友都空群出動，但場內最大亮點，都要數常務副主席田北辰呢身復古蛋撻頭襯西裝嘅造型，喺芸芸黨友突圍而出之餘，仲畀佢哋大讚「chok」到飛起添！原來田二少出席蛇宴前，先應港產時裝設計師要求以英倫學生Look打扮行天橋，換番套西裝後，連個頭都未執就直接去蛇宴。難得田二少年過六十都仲咁玩得，以蛋撻頭與眾同樂，難怪黨友對呢位chok友都相當受落啦！