政壇：黑英搞復耕冧鄉紳
立法會早前否決新界鄉議局主席劉皇發廢除將大浪西灣納入郊野公園嘅動議後，令政府同鄉議局嘅矛盾白熱化。唔知係咪呢個原因，繼政務司司長林鄭月娥千里迢迢走入元朗參加鄉議局中學嘅畢業禮，冧番發叔之後，好關注環保工作、又曾協助特首梁振英寫環保政綱嘅天文台前台長「黑英」林超英又出手喎！
設計圖片及對白
喺大浪西灣風波，政府喺大大小小嘅場合都重申環保立場，而鄉議局就發起包括村民剃髮、公布歷史文憲，同祭祀抗英烈士等一連串行動，明眼人都睇得出佢哋嘅關係變成點。不過，自政府早前提出將大浪西灣納入郊野公園嘅建議獲立會通過後，雙方表面上似乎暫時休戰。
村民對非政府組織有戒心
立場一直同政府頗為一致嘅黑英，尋日竟提出協助西灣村村民復耕，仲話希望藉此增加村民嘅收入，雖然部分村民對非政府組織仍有戒心，但希望喺誠意推動下，可同村民一齊活化大浪西灣同西灣村喎！正所謂事出必有因，曾就大浪西灣問題話過村民唔可以靠惡，否則香港早已成為盜賊社會嘅黑英，莫非想藉呢個機會緩和局勢？
西灣村村長黎恩回應我哋查詢時話，原來黑英前日同幾名地球之友嘅成員已搵過佢哋見面，並提及幫佢哋復耕嘅事，當中有唔少村民都感興趣o架，因為佢哋前年開始搞復耕，用咗十幾萬元買農具，但之後漁農處就冇再提供支援。
黎村長強調依家只係初步接觸，尚未成事。咁如果佢哋可以復耕，仲會唔會就土地被納入郊野公園而提司法覆核呢？黎村長就話，一事還一事，司法覆核梗係照去啦，因為呢樣關乎佢哋建丁屋嘅問題。照咁睇嚟，似乎政府同黑英要出多幾分力，先可緩和之前嘅僵局喎！
