名校收生爭崩頭 怪獸教育何時休
今時今日嘅香港，搵食難，讀書亦難，搞到成日都可以見到爭崩頭嘅場面。尋日開鑼嘅工展會，大批市民爭購「一元海味」，導致場面混亂，差啲搞出人命。同樣墟冚嘅係，兩間名校尋日分別舉行升中簡介會，亦吸引咗大批家長，幾乎逼爆學校咁滯。香港人唔肯執輸，果然冇講錯。
呢兩間位於中西區嘅傳統名校，其中一間中一學額得一百個，結果吸引咗近千名家長出席簡介會，另一間亦差唔多，幾乎座無虛席。有家長抱怨分身不暇，去得一間去唔到另一間，搞到個心囉囉攣。所以話，可憐天下父母心，家陣名校招生，成功率百裏挑一，家長唔緊張就假，有人話已經參加咗六間學校嘅升中簡介會，頻頻撲撲，究竟為乜呢？咪就係望子成龍囉。
名校招生爭崩頭，年年如是，港人早就見怪不怪嘅喇。前排啫嘛，九龍一間直資小學招生，錄取一百五十人，居然有三千三百幾人報考，簡直係賓墟咁嘅場面。唔怪得唔少家長因為太緊張子女入學問題而患上抑鬱症喇。
最匪夷所思嘅係，有家長為求子女可以入到名校，竟然以名錶叩門，結果搞出一場官司。話時話，有啲家長為子女入讀名校絞盡腦汁，無所不用其極，會唔會衍生出貪腐問題，真係令人擔心o架。
傳統名校爭崩頭，國際學校亦唔例外。國際學校本來係為來港經商同工作嘅外籍人士子女而設，點知近年來愈來愈多本地學生入讀，幾乎反客為主，唔少國際學校本地生比例超過一半，「國際學校」淪為「本地學校」，你話係咪搞笑吖。
名校招生嘅種種怪象，只不過係本港教育亂象叢生嘅縮影。有人話香港太多「怪獸家長」，其實有頭髮冇人想做瘌痢，如果有得揀，冇人想做怪獸家長。講嚟講去，本港教育失敗，家長頻頻撲撲，完全因為有個管治無能嘅「怪獸政府」。
多年嚟，本港教育問題沒完沒了，資源分配不公，政策混亂，改革五時花六時變，搞到學校及家長都無所適從。尤其係傳統名校紛紛轉為直資，大搞貴族教育，清貧子弟被拒諸門外，最不知所謂。至於大學學位長期不足，多數學生淪為教育失敗嘅犧牲品，更加係港府嘅恥辱。
十年樹木，百年樹人。如果用四個字形容香港嘅教育，一定係「誤人子弟」。太一叮都係嗰句，搞教育搞到咁失敗，唔該班教育高官徹底反省，再咁搞落去，唔止誤人子弟，直頭係禍港殃民，叮！
