SUN搞作：少膽虫手記：免費奶
周日嘅下午特別寧靜，當眾編輯們埋頭苦幹地工作時，「啪！」淫賤黎放低一大堆紙包豆奶响枱面，四萬咁口：「埋嚟！埋嚟！見你哋做得咁辛苦，請你哋飲嘢high tea喇！」少膽虫瞄一瞄啲奶，心諗「腦細愈嚟愈孤寒，萬歲都淨係請飲奶，虧佢諗得出！」不過貴為左右手嘅少膽虫，雖心裏說不，口裏卻很誠實擦鞋：「腦細，連你最鍾意飲嘅奶都公諸同好，不嬲都話咁好嘅腦細去邊搵吖！」淫賤黎聽後嘴角上揚：「嘻嘻！咁你仲唔快啲飲！」
此刻，少膽虫明白「我不入地獄，誰入地獄」嘅道理，隨即手執豆奶，一飲而盡。突然，肥豪戰戰兢兢話：「咦，點解啲奶個BEST BEFORE係上個月廿六號嘅……」
少膽虫不禁疑惑望向手上包飲完嘅豆奶，赫見同樣標示，語帶淚聲，慌張詢問淫賤黎：「腦細，啲奶過期嘅……」淫賤黎怒氣辯解：「過期？食環署都話賣逾期嘅BEST BEFORE係唔違法，我先入幾箱奶畀你哋歎，你哋飲咗都唔會有事嘅，放心啦！」
「噠……」少膽虫嘅豆奶跌在地上，面露痛苦神情，緩緩吐出：「好似……似……絞肚痛……要去廁所……」說時遲，那時快，肥豪轉身拎份《爛果》遞畀少膽虫，窩心提醒：「因住廁所好似尋日咁冇廁紙，拎定啲紙頂住先！」
