SUN搞作：SUN官場現形記：貪湯變豬頭
貪湯任內腐敗醜行多多，早前已經畀立法會帳委會點名譴責，依家專責委員會又話要查佢嘅漏網之罪，李衞心諗貪湯一定震過貓王，點知就見到佢同班公公婆婆鬥搶一蚊海味福袋……
李衞：你個貪湯，依家專責委員會要再查你嘅漏網之罪，你仲掛住喺度搶海味嘅？
貪湯：呵呵，嗰個無牙委員會，根本無權召我去審，我使乜驚？
李衞：唔通你真係咁厚面皮唔出席？唔怕畀人恥笑咩？
貪湯：厚面皮係成功男人必備條件，我引以為傲！
李衞：（怒）你任內貪到盡都未同你計，依家仲要打阿婆尖搶海味福袋？
貪湯：你都識講我貪到盡啦，等我搶晒啲一蚊海味福袋，再喺廉記總部擺檔賣番出去，一來一回，仲唔發過豬頭？哈哈哈哈哈……
李衞：無錯，呢鋪你實變豬頭。
公公婆婆：打到呢個貪湯變豬頭！
貪湯：嘩……
