SUN奇古怪：SUN潮語：【肯肯定】

就係咁，「肯肯定」就旋即變為潮語，以表達「肯很定」、「很肯定」、「肯×定」、「很很定……總之係肯定」嘅意思。

記得小時候睇電視，見到殖民地時代嘅立法局議員，個個外表俊逸尊貴，說話盡顯學識見地，一派精英風範，係社會賢達上流社會先至會做到。嗰陣時立法局嘅民主成分雖然係低，但起碼唔會亂咁嚟，胡亂派餅仔，搵啲九唔搭八自己友做議員。當然，當時仲未有民建聯，更加冇啲甩皮甩骨嘅所謂政客喺度吹水唔抹嘴，立法局真係有種權威嘅感覺。但係自從主權移交，立法局由「局」轉「會」之後，十六年嚟形象不斷插水，加上建制派人士以近乎屈機嘅手段搶得大量議席之後，立法會就被戲稱為垃圾會。外表談吐慘不忍睹嘅固然大有人在，連基本政治智慧，甚至連簡單邏輯都未搞得清嘅亦都比比皆是。千金阿太潑婦罵街令人大開眼界，喺堂堂立法會香港最高權力機關爭取公廁有廁紙嘅議員，亦都令人目瞪口呆。最離譜嘅係，有立法會議員上電視爆粗，仲要唔認，呢啲真係「肯肯定」係低水平！

事緣Tree根議員亮相一個電視時事節目嘅時候，回應主持提問時爆咗句疑似粗口「肯L定」，「L」係一句以此字母為聲母發音嘅粵語粗口字。經反覆重播後，網民依然都係聽到個「L」音，連電視台重播片段時都加上咇一聲，代表粗口。但係當事人Tree根哥竟然話佢當時講嘅係「肯肯定」，係表示好很肯定嘅意思。

Tree根議員名叫鍾樹根，聽個名都知係非常之Down To Earth，即係好「地」。所以佢講句肯乜定，都非常合情合理。到底嗰句係「肯肯定」還是「肯×定」，就只有佢自己先知。不過有一點可以「肯肯定」嘅就係，無論佢水平有幾爛，下屆佢都一樣高票當選。點解？因為呢度係中國香港囉！