政壇：搞搞政：黃家和教路 菜尾煲靚湯
香港人經常被指眼闊肚窄、浪費食品，為咗向下一代灌輸惜食文化，推動消減廚餘嘅「齊惜福」尋日喺中華廚藝學院大搞「綠色自助餐」，向在場六十幾位小學師生宣揚珍惜食物，本身係飲食業中人嘅齊惜福項目委員會主席黃家和就教大家幾招，仲解釋港人鍾意嘅經典食品如「碗仔翅」同「羅宋湯」，都係食材嘅頭頭尾尾而嚟，可見想做到零廚餘並唔難。
設計圖片及對白
黃家和話，昔日酒樓廚房為大戶人家炮製「魚翅撈飯」，總有啲零散嘅翅頭翅尾剩，有人不甘食材就咁浪費，於是加入肉絲、木耳同醬油，成為今日街知巷聞嘅道地食品「碗仔翅」。此外，一般食肆都會將蔬菜外觀最好嘅部分奉客，而賣相稍次嘅部分則成為煲湯材料，好多茶餐廳供應嘅「羅宋湯」都係由此而嚟。不過，公道啲講，並唔係所有食肆都係咁做，相信有啲為求質素都選用最好嘅部分。
菜頭菜尾有去處，其他廚餘又點呢﹖黃家和話打算添置廚餘機嚟解決問題。佢話已經物色一部韓國製造嘅廚餘機，可以將殘羮剩菜轉化為有機肥料，啱晒佢喺公司露台栽種嘅植物。
