政改首輪諮詢正式展開,按照慣例,政府會向各大持份團體諮詢,商會代表當然唔少得。以往政府通常只會諮詢俗稱「四大商會」嘅香港總商會、工業總會、中華總商會同中華廠商聯合會,但有商會中人叫我哋留意,今次政改可能有唔同玩法,政府分分鐘會改為諮詢「八大商會」,變相將商會版圖重新洗牌。

八大商會除咗傳統四大商會之外,仲有中華出入口商會同地產建設商會,呢兩大商會都有多年歷史,成員有頭有面,獲政府重視都算正常。至於餘下兩大商會中國企業協會同香港中國商會,就係近年先至崛起,尤其後者仲係呢兩、三年至突然成立。該兩大商會嘅團體成員全部嚟自「紅色巨企」,例如華潤、招商局、中國太平保險等,擺明係代表在港嘅紅籌國企發聲。

「紅色商會」喺本地插旗,有商會中人分析,咁做法有助「溝淡」傳統四大商會、尤其有唔少英資美資企業成員嘅總商會意見,當去到政改同廿三條立法等敏感時刻,就可以借助「紅色商會」力量替阿爺發聲。事實上,早前商界聯署反佔中,就首次用到八大商會名義,相信背後係經過高人指點。

第一手消息請下載on.cc東網iPhone/iPad/Android Apps