政壇：霍啟剛初試咖啡拉花
香港青年聯會賢慧社日前搞咗個分享會，邀請得近期因為參加《窮富翁大作戰》節目而人氣急升嘅咖啡店老闆廖偉芬（Jennifer）出席，同大家講創業成功之道，順便過兩招咖啡拉花絕技。青聯主席霍啟剛都去趁熱鬧，仲學習吓拉花，雖然佢睇見自己拉出嘅「變形花貓」都笑咗出嚟，但對首次拉花嘅人嚟講算係唔錯喇。
霍啟剛首次學咖啡拉花，拉出一隻「變形花貓」。
Jennifer話，做生意最緊要認定目標，唔好太計較，要先畀甜頭客人。講到佢邂逅人生第一杯咖啡，係七歲時同爸爸一齊去跑馬地一間好出名嘅茶餐廳嘗試。
