政壇：孫穎掃火炭貨倉博升值
香港物業有價，好多投資者都鍾意買磚頭，不過近月樓市吹淡風，買樓風險增加，名人圈開始流行買貨倉。精於置業嘅「鋼琴公主」孫穎，早前曾出書教女人投資，唔使靠男人，私底下佢坐言起行，年前開始四出物色貨倉，月前就斥資二百六十萬元，喺屋企附近嘅火炭工業區掃入一個近千呎嘅貨倉自用。
孫穎
孫穎話，多年嚟收到唔少好友送贈藝術品，份份背後都有故事，點捨得掉吖。佢曾經諗過買埋屋企隔籬單位打通，但諗深一層將豪宅變貨倉，並唔划算。由於佢六年前曾經購入一個觀塘貨倉，持貨幾年，賺咗一倍，加上眼見唔少貨倉升值潛力不菲，一於再入貨。咁買貨倉有乜秘訣呢？孫穎話，第一要交通方便，鄰近鐵路沿線；第二係要乾淨、企理，間隔有窗，確保空氣流通，放置嘅雜物先無咁易發霉喎。
