政壇：陳健民暗示有暴力抗爭
近期香港政壇吹起一片暴力風，呢頭有人掟蛋，嗰頭有議員提起汽油彈，佔領中環（佔中）活動發起人之一陳健民尋日都有回應呢兩件事，但佢唔係如過去推銷佔中時宣傳非暴力，而係大講南非前總統曼德拉喺人權抗爭時曾經武力抗爭，仲好似留有後着咁靠嚇，警告如果和平佔中都無法爭取民主，本地年輕人會否仍相信和平抗爭力量就不得而知嘞！陳健民嘅言論有冇暗示，有心人要自己解讀，但泛民再三借曼德拉抽水就真係好冇創意。
設計圖片及對白
曼德拉因病辭世，白鴿黨嘅立法會議員單仲偕日前喺立法會已抽水，尋日輪到陳健民接棒，喺電台節目上大講曼德拉抗爭往事，自言對曼德拉嚟講，道德力量同策略考量一樣重要，其中非暴力抗爭只係策略，非至高無上嘅原則，「如果非暴力抗爭唔能夠令南非政府放棄種族隔離政策，就要考慮武裝鬥爭」。跟住佢話，作為佔中組織者亦深受曼德拉啟發，仲指最近出現嘅掟蛋事件同回響顯示民怨沸沸揚揚。
香港同當年南非兩回事
佢警告如果北京強要逆歷史潮流而行，連和平佔中都無法為香港爭取民主，年輕後來者係咪仍相信和平抗爭力量就不得而知嘞。所以佢促請有責任嘅從政者，不管係建制派或泛民主派都應該盡快進行政治協商，尋求疏解之道。佢以曼德拉都要武裝鬥爭作例子，係咪應該向青年學生解釋吓南非六十年代嘅背景呢﹖當時軍警悍然槍殺六十幾名包括婦孺嘅黑人，白人、黑人權利差天共地，背景同今時今日嘅香港完全兩回事，隨便作唔負責任嘅引伸係咪一個學者應有嘅態度呢？
泛民每逢元旦、七一遊行都有連串抗爭行動，激進者已經有喺中環攔行車道、衝擊警方嘅行動，如果行動更激、再升級，香港嘅安定局面會唔會一去冇回頭呢？難怪工商界擔心標榜愛與和平嘅佔中行動會走樣。
