CY撐港貨 買Duck滿載歸
【本報訊】延續黃色膠鴨仔熱潮，本港工業家林亮喺上世紀生產嘅港版黃色膠鴨玩具，經過重新設計後，尋日喺維園工展會開幕正式亮相。特首梁振英（CY）為咗支持香港貨，一口氣掃咗四千八百多元膠鴨產品。梁太唐青儀之後就喺另一活動將購買嘅鴨仔文件夾贈予小學生，並喺禮賓府向一班庇護工場人士送上黃色鴨仔保溫杯蓋，以預祝聖誕。食品都係工展會嘅主打，CY夫婦喺場內一間有機食品社企試完薑餅又試糖，最後滿載而歸。
林亮（右三）介紹完義賣嘅港版膠鴨仔後，梁振英夫婦一口氣掃咗四千八百多元膠鴨產品。
李錦記第三代傳人李文達夫婦（右四及左四）親自到攤位招呼廠商會副會長顏吳餘英（右二）等人。
由中華廠商聯合會（廠商會）舉辦嘅工展會尋日開鑼，廠商會一眾會董都現身撐場，出錢又出力。CY夫婦喺開幕禮後隨即參觀會場，林亮親自介紹場內義賣嘅港版膠鴨，CY夫婦似乎對膠鴨愛不釋手，最後掃咗二百個有鴨仔裝飾嘅磁石文件夾、三十個膠鴨杯蓋同三隻工展鴨。而商務及經濟發展局局長蘇錦樑（Greg蘇）亦買咗個一百元嘅鴨錢箱，話會「加啲餡」再送畀孫女做禮物咁話。
梁太對有機食品都好有興趣，喺食品檔食完薑餅、薑糖，又拎住樽花生醬聞完又聞。檔主就力銷聲稱食用又得、用嚟落妝按摩都得嘅有機山茶油，CY聽完即刻要咗支大支裝，連埋其他糖果、醬料，使咗六百多元。
Greg蘇歎即製麵條
至於Greg蘇就似乎好鍾意食麵，除咗買咗幾盒麵外，又同立法會主席曾鈺成、林大輝、鍾國斌等議員去睇製麵機。大廚即場將啲麵粉倒落部機度，一條條新鮮麵條就咁製成，大廚煮熟啲麵後就撈埋啲芝士畀大家試食，個個食完都大讚好味道。
