市面又見奶粉荒 官僚無能累街坊

呢，近日部分藥房再度出現奶粉缺貨情況，北區藥房個別品牌一返貨，即時吸引大批人搶購，當中既有水貨客，亦有本地家長。有傳媒借題發揮，聲稱某品牌奶粉賣到五百幾蚊一罐，高出超市近一倍，引起社會嘩然。而藥房就指報道內容有問題，保留法律追究權利。雙方各執一詞，都唔知究竟邊個係真，邊個係假。

無論點都好嘞，奶粉供應緊張的而且確係事實。業界人士話喎，農曆年未到，奶粉已出現缺貨，水貨客以螞蟻搬家形式將奶粉運返內地，藥房返貨一日就被搶購一空，本地家長唔徬徨就假。

講起真係搞笑，「盲搶奶」再現，始作俑者居然係一直唔肯撤銷限奶令嘅港府。食衞局局長高永文早前喺立法會重申，本港未有成熟條件撤銷限奶令，仲「溫馨提示」家長要有備無患，為嚟緊嘅聖誕及農曆新年長假做足準備工夫，提早入貨，儲定奶粉過節，以免供應短缺影響BB咁話。有議員當堂批評當局根本係製造恐慌，變相鼓勵家長快啲去買奶粉。

冇錯嘞，高官亂噏廿四叫人儲定糧，即係叫人去搶購啫，唔怪得家長人心惶惶喇。高永文尋日又走出嚟解畫，除咗呼籲零售商唔好為一時利益狂加價，又話如果坐地起價投訴屬實，可以採取制裁措施喎。

叮！講就天下無敵，做就有心無力。如果當局真係搞得掂嘅，點解限奶令出台逾十個月仲係七國咁亂吖？講來講去，都係因為港產官僚冇料到，眼高手低，無力協調供應，惟有退而求其次，一刀切限制旅客攜帶奶粉數量，結果因為執法甩甩漏漏，引起唔少爭拗，簡直係添煩添亂。

本來呢，內地人蜂擁南下買奶粉，係香港嘅巨大商機，可惜港府無能，水貨客為患，激化中港矛盾，搞到要推出限奶令，有錢都唔賺。話時話，年初出現搶奶潮，其實貨源短絀僅限於個別地區同某幾個品牌，只要政府積極協調，推動業界改善供應鏈，根本唔使出動限奶令呢一招。

堂堂特區政府，連奶粉供應咁小嘅事都搞唔掂，左右為難，進退失據，唔怪得香港政不通，人不和，亂象叢生喇。內地官媒曾諷刺港人懶，「有錢都唔賺」，其實計太一叮話齋，奶粉問題搞到一鑊泡，唔係港人有錢唔賺，而係港產官僚實在太無能，叮！