SUN搞作：少膽虫手記：同紙唔同命
「啊！」少膽虫喺廁所入面悲鳴，「點解，點解會無廁紙？」夜深人靜，高呼係少膽虫唯一嘅出路。「唔使叫喇，我喺度成日都無人理……」隔籬廁格傳來肥豪絕望嘅聲線。「好哋哋公司點解會無廁紙？」少膽虫大惑不解。肥豪一陣苦笑，「腦細驚畀人攞走啲廁紙上立會做騷，所以下令收晒啲廁紙……」
「妖……孽，真係國之將亡，必有妖……孽，連廁紙都搞，亡國之名真係捨你其誰？」此時此刻，少膽虫可以做嘅就只有咒罵。「不如諗吓點樣渡過呢個難關仲好。」聽到肥豪嘅建議，少膽虫本能地望住自己嘅手指，「唔通無廁紙，就要用……」呢種好比「爆谷」嘅製造過程，真係叫少膽虫情何以堪？
「唔得！千祈唔好咁諗！」肥豪大叫驚醒少膽虫。「你嘅想法我都諗過，但咁樣傷害身體，咪即係出賣自己，我哋平日仲賣唔夠畀淫賤黎咩？」少膽虫生平首次認同肥豪，「講得好，我哋唔可以再賣o架喇！」雖然少膽虫講就兇狠，但唔出賣「身體」，僅餘方法就係犧牲荷包入面嘅「紙」。呢個時候，少膽虫眼角一瞄，竟然見到有份《爛果》，「肥豪，我哋有救喇！」
同紙唔同命，大概就係呢個意思……
