政壇：唐唐談普選又爆金句
前政務司司長唐唐從政生涯多次爆出金句，經典金句包括「捍衞核心價值係最核心嘅核心價值」、「嗰班友吊吊揈喺街度」等。佢尋日接受電視台訪問，回顧當年促成中央同泛民主派就一○年政改方案溝通時，又爆出立法會過去「隨住社會演變不斷演變」嘅金句，闡述一七年特首普選一人一票非終極方案，認為今次只係民主政制一個中途站，唐唐「金句王」本色並非浪得虛名。
講番唐唐今次政改訪問，暫未有石破天驚嘅內幕爆出，佢強調當年港府同中聯辦保持溝通，又轉達白鴿黨希望同佢哋溝通嘅訊息，強調溝通有助增加雙方了解，而事實上政改亦非特區政府全權話事喎。其後佢就疑似為現屆政府推行政改「獻計」，認為要爭取泛民主派信任，扮演溝通橋樑，並呼籲泛民不應糾纏於細節。縱觀唐唐喺訪問中較為出人意表嘅地方，就係首次透露自己準備就政改提建議，但要進入第二階段諮詢討論具體方案時先會公布，唔知佢到時會有咩精闢見解呢？
