政壇：悼曼德拉單雞抽水

南非駐港總領事館尋日都喺中環聖約翰座堂舉行悼念儀式，但點都唔及白鴿黨立法會「單雞」單仲偕提出要喺下周三大會上休會辯論，表面上聲稱要悼念曼德拉，但就同政改諮詢扯上關係，可謂抽水抽到盡。

不涉公眾利益 無急切性

單雞喺尋日內務委員會上提出要求喺下周三大會上休會辯論，表揚曼德拉對國際社會嘅貢獻，佢話曼德拉一生為國際社會貢獻良多，現時香港正處理政改呢項複雜社會議題，大家可以從辯論中了解曼德拉嘅功績喎。

建制派議員「譚Sir」譚耀宗認同曼德拉畢生貢獻，但就認為議題同公眾利益無關之餘又無急切性，反建議泛民主派可以喺議會外景仰呢位一代偉人，又話若然今次開此先例，日後再有類似偉人過身，而立法會又無休會辯論時，就會好似唔尊重對方。

醫學界郭家麒話，大家明明話要有商有量討論政改，但譚Sir依家就口是心非，連啲咁小嘅事都唔包容，試問將來又點可以繼續向前行。譚Sir黨友葛珮帆話，曼德拉一生主張愛與和平，但郭家麒如今不惜上綱上線，借意發表批評建制派嘅言論，發言更充滿人身攻擊，擺明係同曼德拉嘅主張背道而馳。最後議案喺建制派反對下以二十二票贊成、二十七票反對，兩票棄權被否決。