沒有最奢華，只有更奢華。香港電台係大花筒，呢樣人人都知，但大家又知唔知，港台將軍澳新大樓洗腳唔抹腳，成為深不見底嘅財政黑洞呢？咁搞法，港府識印銀紙都唔掂喇。

係咁嘅，港台新大樓造價三級跳，由最初估算不足十五億元暴增至現時六十點五億元，引起社會嘩然。喺立法會窮追猛打之下，當局日前首次披露新大樓造價暴升嘅分項細數，唔睇猶自可，一睇把幾火，原來新大樓造價瘋漲，除咗基於一般通脹及建築成本上漲等因素之外，主要原因就係港台揮金如土，廣播技術及設計最新最靚最豪不特止，仲要喺同一座大樓內，將電視及電台部門完全獨立運作，搞到消防、供電及通訊系統全部「打孖上」，經費倍增。正所謂睇餸食飯，港台建新大樓極盡奢華，有乜可能唔嚴重超支吖！

更令人擔心嘅係，呢個只係噩夢嘅開始咋。一來建造費有可能再度超支，要追加撥款填氹，二來咯喎，新大樓一闊三大，經常性開支勢必水漲船高，以後納稅人年年找數，年年燒錢，簡直沒完沒了。呢，淨係興建輔助發射站咋，就要六千四百幾萬，每年仲要額外支出一千四百幾萬維修保養費，問你怕未。

都係立法會議員鬧得啱，港台定位係平民電台，而唔係貴族電台，有冇必要打造勞斯萊斯級新大樓吖？尤其係現時兩間免費電視台已經有提供數碼廣播，港府又啱啱批多兩個免費電視牌照，港台家陣大興土木發展數碼電視服務，係咪變咗法國大餐，多舊魚吖？咪話太一叮踢爆吖，港台慷納稅人之慨，開拓新服務係假，搵藉口大花筒就真。咁多年嚟，港台管理混亂，醜聞百出，唔係浪費公帑，就係欺詐公帑，仲嫌唔夠衰咩！

講真，如果港台真係有存在價值，對香港有貢獻，建新大樓開新服務唔係冇得傾，弊就弊在港台一貫打住「編輯自主」旗號，當正自己係無王管嘅獨立王國，唔止冇履行職責，推動社會和諧，輔助港府施政，反而一味挑撥離間，陰陽怪氣，好心港府唔好做埋啲捉蟲嘢啦。

唉，都係前朝曾蔭權政府嘅遺禍。當年檢討公共廣播服務，如果乘機將港台摺埋咪好囉，家陣留下後患，納稅人仲要付出更大代價，噩夢沒完沒了。計太一叮話齋，香港貧窮大軍不斷增加，無殼蝸牛望樓興嘆，港府如果真係有錢無碇使，不如興建多啲公屋好過喇，叮！

第一手消息請下載on.cc東網iPhone/iPad/Android/Windows Phone Apps