城中鏡：施子清展墨寶 三代同撐
福建幫頭領施子清係當代書法家，政界中無人不知。日前中國書協香港分會成立一周年，喺中央圖書館搞咗個書法展覽，施子清身為分會主席，又點可以唔出動珍藏墨寶公諸同好呢？
施子清（後右四）展出墨寶，施家總動員捧場。
呢個展覽一共收集五十幾位書法名家珍藏，共一百六十幾幅展品，當中包括國學大師饒宗頤，而施子清就提供最少四幅書法展品，其中一幅題為《好花難種》更係佢嘅心頭好、歷年最滿意之作。開幕禮當日，施子清心情非常靚，原來施家三代同堂都有出席捧場，唔怪得之施老先生咁開心啦!
同場仲有唔少名人借出墨寶，例如中聯辦主任張曉明、前新華社香港分社副社長張浚生等。
不過，唔少市民日前到場欣賞時，有人就撞到張曉明幅墨寶東歪西倒，如果佢本人在場，一定非常心痛。
