城中鏡：大摩董事聖誕慈善獻歌聲
摩根士丹利趁聖誕唱歌籌款已搞咗好多年，籌款數字仲一年比一年多添，今年嘅「摩根士丹利董事合唱團」已經係連續第十一年舉行，並且係連續十七年支持「愛心聖誕大行動」（Operation Santa Claus），今年再破紀錄，總共籌得逾三百二十萬元。
大摩亞太區聯席首席執行官Bill Strong負責領唱。
大摩董事合唱團獲香港保護兒童協會嘅小朋友伴唱，氣氛十足。
大摩亞太區聯席首席執行官Bill Strong尋日負責領唱，帶領台上由同事贊助嘅逾六十位高層唱畢八首聖誕歌，全程仲有香港保護兒童協會嘅小朋友伴唱，加上現場唔少圍觀者都唱埋一份，聖誕未到，氣氛已經十足。大摩全球援助服務主題一向為小朋友健康着想，而今年籌款對象就係「彩虹計劃」，主力助患有自閉症嘅兒童走出黑暗。
其實大摩仲有好多同事想為慈善出多分力，所以舊年開始公司同事合力搞多咗個甜品籌款行動，由香港同事親手炮製愛心蛋糕或甜品，經內部網上拍賣競投，凡出價者無論最終係咪投到，都會捐出善款，連埋董事合唱團嘅善款，就成就到捐款高達逾三百二十萬元，據悉蛋糕競投價最高紀錄係二萬四千元。
