單日堅夫婦（左一及二）到場支持樂善堂，韓世灝（右一）同太太Selina（右二）親自招呼。
九龍樂善堂早前舉行「香江話當年」一百三十三周年慈善晚宴，為「樂善關懷基金」籌款，以便向有緊急需要人士提供經濟支援。當晚數百賓客去捧場，主席Johnny韓世灝同太太Selina一見到懲教署署長單日堅夫婦就特別好傾，原來早前單日堅邀請樂善堂一班董事局成員去歌連臣角懲教所歎下午茶，嗰度有專為在囚青少年而設嘅茶餐廳培訓中心。
劉文文（右）瞓身推動反吸煙，楊小玲（左）話吸煙會令暗瘡加劇。
Johnny笑笑口咁話，在囚人士嘅廚藝認真唔錯，尤其係奶茶，如果佢將來開茶餐廳，一定會請番呢班後生仔喎。單日堅就話呢間茶餐廳成立未夠兩年，已培訓好多在囚人士，方便佢哋重返社會後可以即刻投入工作，唔少大型連鎖飲食集團都肯聘用佢哋，成效唔錯。佢又話十幾年前樂善堂係首個支持在囚及更生人士嘅慈善機構，為咗令城中善團進一步了解懲教署工作，所以間中會邀請社會人士去歎茶。
防暗瘡妙法：戒煙
曾經係樂善堂百幾年嚟首位女主席嘅吸煙與健康委員會主席Lisa劉文文都有到場，最近傳聞佢再出招，打算建議政府勁加一倍煙稅，佢承認確有此事，透露即將去信特首梁振英同財爺鬍鬚曾，希望下一份財政預算案採納佢哋意見，令吸煙人口比例由依家嘅百分之十點七降到單位數字。
講到本港女煙民不降反升，Lisa都話好頭痛，話要搵常務總理兼「暗瘡剋星」Jackeline楊小玲幫手。Jackeline即刻拍心口應承，仲話吸煙會令暗瘡加劇，而且容易面黃、難去印，貪靚嘅城中姊妹最好就戒煙嘞。
第一手消息請下載on.cc東網
